Davao City – Unom na ka tuig nahimong magtutudlo sa Davao Christian School si Pastora Joana Uy diin matag bulan dili mulampas sa kinse mil ka pesos ang iyang madawat nga sweldo.
Sa sweldo na gikuha ni Pastora Joana ang iyang 3,500 ka pesos nga renta sa balay walay labot sa tubig ug kuryente, sais mil pesos sa pagkaon ug grocery, 1,500 pesos sa buhis ug apil na ang monthly contribution sa SSS, Philhealt ug uban pa.
Gumikan kay gamay na lang mabilin sa sweldo dakong tabang alang kaniya nga ma-take home ang gikaltas nga buhis nga unta para sa gobyerno karon nga gipatuman ang Tax Reform For Acceleration and Inclusion Act kun TRAIN law.
Nasayod si Pastora Joana nga dunay dakong epekto sa basic commodities ang TRAIN Law tungod sigurado musaka gayod ang presyo sa mga nag-unang palaliton tungod sa siyete pesos nga excise tax sa petrolyo.
Aron kuno dili mabati ang epekto sa excise tax, planohon og maayo ang paggasto sa sweldo sulod sa usa ka bulan kay kung dunay diskarte dili gayod maglisod bisan og musaka pa ang presyo sa mga palaliton.
Busa dili kumbensido si Pastora Uy nga magkamang sa kalisod ang mga wage earner tungod sa TRAIN law apan kun magpaturagas sa paggasto ug dili kamao magdumala sa financial lup-ugon gyod sa kalisdanan.
Sumala usab sa usa ka negosyante nga si Pastor Jessie Serenobes nga dakong matabang ang TRAIN law sa mga trabahante nga gadawatan lang og basic salary tungod dili naman makaltasan og buhis ang sweldo matag bulan.
Bisan pa og musaka ang presyo sa mga palaliton makasugapar ra gihapon ang kadaghanan tungod sa dugang income mabalaik sa mga wage earners matag bulan.
Kampante si Pastor Jessie nga dili mohatud sa tumang kalisod ang dugang buhis sa pipila ka produkto sama sa petrolyo inay dugang ayuda kini aron makaarangkada ang mga proyekto ug mga programa sa gobyerno alang sa katawhan.
RadyoMaN Joel Viray
