Davao City – Gi-angkon karon ni Brgy. 76-A Kapitan Rolando Trajera nga nag-ungaw sa hulga sa tsunami ang ilang barangay ugaling matigayon ang makusog nga linog dinhi sa siyudad sa Dabaw.
Gi-angkon ni Trajera nga maghatud unya og dakung kadaut sa iyang barangay ang tsunami ugali mahitabo ang mangilngig nga linog sa dakbayan.
Segun ni Trajera nga mukabat lang sa 20 minutos ang gintang muabot sa barangay ang tsunami bisan og milya-milya pa ang dagan niini gikan sa kadagatan sa Davao Oriental.
Ug tungod kay mokabat ang residente sa 30,000 kinsa nagpuyo daplin sa dagat hayan malisdan ang barangay sa insigida nga paghikling kanilang tanan paingon sa habog nga lugar.
Tungod sa bitbit nga peligro sa tsunami, regular gipailawom sa tsunami drill ang katawhan sa Brgy. 76-A sud sa duha ka hugna sa usa ka buwan sulod sa usa ka tibuok tuig.
Tumong sa drill mao nga tudloan ang mga residente sa angay’ng buhaton aron maluwas sila gikan sa kamatayon nunot unya sa paghapak sa tsunami, pagpasabot sa Kapitan.
Gipaniguro pa ni Trajera nga paspas ug siguradong masunod sa katawhan ang ilang safety protocol ugali maigo ang makamatay ug disastroso nga tsunami sa ilang barangay.
Hinoon ang gikabalak-an lang sa punong barangay basin dili nila makaya ang pagluwas sa liboan ka mga residente kun mukabat sa lima ka kilometros ang lampornason sa higanti nga balud sa siyudad.
RadyoMaN Joel Viray
