Gika-intapan sa mga nalambigit sa droga ug sa mga kriminal ang riding in tandem tungod kay dili gyod nila binlan og kinabuhi ang ilang target.
Na-ila-ila sa Stp Investigative Team ang usa ka kanhing Hitman nga si alyas Max.
Gisaysay ni Max kun sa unsa nga paagi nakasulod siya sa riding in tandem dihang nag-edad pa kini og 19 anyos.
Matud ni Max, matag tawo nga ilang patyon lima ka libo ka pesos ang bayad nga bahinon niya ug sa iyang partner.
Gitug-an ni Max nga pito na katawo ang iyang nabugha ug katapusan iyang napatay nagpakilooy pa kay lagi daghan og asawa ug mga anak apan tungod sa kadautan gipatay niya kini.
Ug mao kadto ang pinaka-unang higayonan mibati og guilty sa kaugalingon si alyas Max ug dinhi nagsu-god nga adunay nagapakita kaniya sa damgo gikan sa mga tawo nga ilang gipatay.
Dili sayon ang pagkalas ni alyas Max sa Riding in Tandem tungod kay siya na mismo ang nahimong target ug tuod man wala dangti og dugay nakuha ra gyod siya sa mga armado.
Na-comatose sulod sa Davao Medical Center ug karon SPMC na si Max human milapos sa spinal Cord ang bala sa pistola ug dugang pa nga gitiwasan siya sa pantog.
Nag-ungaw sa kamatayon si Max dihang unang higayon nakasangpit siya sa pangalan sa Ginoo pinaagi sa hunahuna.
Human giila ni Max ang Ginoo, kalit midan-ag ang iyang palibot ug iyang nakita ang mga nakaputi nga daw mga anghel nga naglipay hangtud gideklara siya sa Doktor nga patay na sulod sa unom ka minuto.
Ang pinakanindot nga kasinatian ni Max human siya gianunsiyo nga patay na mao ang mga kamot nga mitapion sa iyang ulo apan walay makitang panagway ug didto na nabuhi siya pag-usab.
Usa na ka-paralisado si alyas Max,apan mao kini ang nag-abli sa pultahan aron mas mailhan pa gyod niya ang Ginoo pinaagi sa suod niyang higala nga kanhing partners in crime.
Sa unang higayon, daw gibugalbugalan pa niya ang iyang amigo nga gitawag niya og Choy tungod dili kini ka tuo nga ma-usab kini gikan sa kadautan sanglit nasayod si Max binuhatan sa iyang higala.
Wala kapugngi ni Max ang pagtulo sa luha sa iyang mga mata dihang mituhog ang pulong sa Dios nga gipaambit ni Choy kaniya hangtud naghinulsol kini ug gidawat si Kristo isip manluluwas ug Dios sa iyang kinabuhi.
Ang pagdawat niya kang Kristo nahimong unang tulay aron iyang matilawan ang pagkamaluluoy ug pag-kamahigugmaon sa Dios nga unta dili angay sa mga makasasala sama ni Max.
Wala gisapayan ni Max nga paralisado siya karon ang labing importante mao nga bulahan siya nga gibag-o siya sa Dios gikan sa kadautan.
Ug tungod niini, aktibo si Max sa pagsangyaw sa pulong sa Dios gamit ang cellphone ug sa 10mil niya ka followers sa iyang facebook account.
Mga kasama, walay tawo ibabaw aning kalibutana nga dili makasasala atubangan sa Dios, ang tanan na-kasala ug nawad-an sa himaya sa Dios ug ang silot mao ang kamatayon didto sa impiyerno.
Sama kang alyas Max nga kaniadto mamamatay tawo apan karon usa na ka bag-ong binuhat human siya naghinulsol ug gidawat si Kristo isip personal nga manluluwas ug Dios sa iyang kinabuhi.
Ikaw usab kasama, kung muduol ka sa Dios, matinud-anon Siya mupasaylo ug mudawat kanimo aron dili ikaw masilotan sa ikaduhang kamatayon sa impiyerno.
RadyoMaN Joel Viray
