Davao City – Gumikan sa walay hunong nga pagsaka sa presyo sa gasolina, mitiyabaw na karon ang transport sector tungod gamay na lang mabilin sa ilang kinitaan sa pamasada gumikan nipaingon na sa pagpatubil.
Usa ang Southeastern Mindanao Diversified Drivers & Operators Cooperative nga nagsang-at og petisyon sa Land Transportation Franchising and Regulatory Board (LTFRB) sa kaulohan aron pangayoon ang diyes pesos nga usbaw sa pletehan dinhi sa siyudad.
Sa gipagula nga hukom sa LTFRB central office, piso lang ang gi-aprobahan busa wala malipay ang mga drivers niini rason nga kuwang ra kaayo kini gumikan sa kamahal sa gasolina karon.
Si SEMDOC President Maning Duran midepensa sa usbaw sa pletehan sanglit apektado na daw ang ilang kinitaan sa pamasada sa padayon nga pagsaka sa presyo sa petrolyo ug pagmahal sa mga palaliton.
Sigun ni Duran, kun dili nila pangayoon ang usbaw sa pletehan dili sab nila mahatag ang hamugaway ug luwas nga biyahe sa mga pasahero tungod dili na nila mapakondisyon ang ilang mga sakyanan.
Gipamugos niini nga walay kalainan ang estado sa panakayan niadtong sa panahon ni Marcos ug sa karon gumikan pareho ra man inutil ang ahensiya nga gitahasan sa paglantaw sa presyo sa petrolyo.
Aminado kini nga makatabang unta sa publiko kun wala pa gibaligya ni Fidel Ramos sa pribado ang Petron ug wala giwala ni Pres. Fidel Ramos ang subsidiya sa gasolina.
Alang ni Duran, dunay mahimo ang gobyerno sa pagpitol sa mga kumpanya sa petrolyo kun tindugan sa kagamhanan ang istrikto nga palisiya kontra sa kurakot nga mga opisyales nga dali ra masarbunohan.
Miapelar si Duran og pagsabot sa publiko kung nag-usbaw man sila sa pletehan kay alang lamang kini sa kaayohan sa tanan.
RadyoMaN Joel Viray
