Davao City – Hatud sa sunod-sunod nga pagtay-og sa kusog nga linog, ang daghang tawo na-trauma na human sila nahugnoan sa parte sa mga gambalay resulta nga dunay mga naangol ug mga namatay pipila ka semana una ang atong pagkomemorar sa Kalag-Kalag.
Matud ni Agni May Perne, usa ka registered counselor ug psychologist, dili pasagdan ang mga simtomas sa trauma nga makita sa usa ka biktima ug dayon dapatan kini og psychological first aid.
Matud ni Perne, natural lang nga maghatod kini og trauma kay mao kana ang reaksiyon sa mga tawong personal nakatilaw sa pag-ayag sa kayutaan ilabi na ang dili kasarangan nga gikusgon niini.
Gipasabot ni Perne nga lisod gayud malimtan ang eksperyensya sa linog inay magbalik balik gayud sa panumduman ang daw delubyo nga nasinati diin makatabang sa paspas nga recovery sa biktima ang gitawag nga psychological first aid.
Gi-discourage ni Perne ang stress debriefing kay subay sa bag-ong pagtuon, makapasamot ug dili makatabang sa pagwagtang sa trauma sa biktima ang maong klase sa social intervention.
Ang bugtong buhaton lamang aron mahuwasan sa kulba ang mga biktima mao ang pagpakalma ug pagpa-relax sa ilang gibati uban sa suporta sa pamilya ug sa mga tawo sa palibot, matud ni Perne.
Apan kun madangtan na gani og tulo ka bulan ug wala gihapon mawala ang trauma kay nasaksihan niini ang paggun-ob sa mga gambalay ug pagkaangol ug pagkamatay sa ubang biktima, nagkinahanglan na kini og counseling gikan sa mga eksperto.
Sa pikas bahin, gisugyot ni Dr.Ariel Coleto, presidente sa Loving Care Ministry International nga makatabang sa biktima sa katalagman ang pulong sa Diyos aron maayo gikan sa nasinating trauma ug labaw nang masabtan niini nga ang mga panghitabo sa kalibutan nakasulat na diha sa Bibliya.
RadyoMaN Joel Viray
