Dili na mangita ang pulis nga nagbantay sa mga quarantine checkpoint kung mobiyahe ang usa ka indibiduwal sulod lamang sa rehiyon diyes o Northern Mindanao, base sa bag-ong omnibus guidelines sa Inter-Agency Task Force o IATF.
Atol sa online press conference kagahapon sa Regional IATF, miingon si Col. Mardy Hortillosa, ang tigpamaba sa Police Regional Office-10, nga dili na kinahanglan ang travel authority sa gitawag og “interzonal travels” ngadto sa mga dapit nga susamang modified general community quarantine o MGCQ ang estado.
Apan, gawas lamang kini kung ang biyahe, leisure o lingaw-lingaw o lag-laag lamang.
Apan bisan paman nga ang Region 10 anaa na sa mas lu-ag nga MGCQ, nagpahimangno kanunay ang PNP-10 ngadto sa publiko sa pagsunod sa mga quarantine protocols ug mogawas lamang sa panimalay kung adunay mahinungdanon nga lakaw o transaksiyon.
Wala pay tambal o kaha bakuna batok sa coronavirus ug daku pa gihapon ang tsansa nga ang matag usa daling mataptan niini.
