Davao City – Subay sa pagtay-og sa Magnitude 6.3 nga linog sa miaging gabii, ang lungsod sa Magsaysay ug Digos City sa Davao Del Sur maoy labing naapektuhan sa paglihok sa yuta sa pipila ka bahin sa Mindanao.
Sentro sa pagtay-og ang lungsod sa Tulunan, North Cotabato ug nabati kini sa ubang bahin sa Mindanao diin dinhi sa Rehiyon Onse, ang lungsod sa Magsaysay ug Digos City ang labing naigo.
Ebidensiya sa kakusog sa linog ang pagkatunga sa yuta ug pagkaguba sa mga kabalayan ug natabunan nga buhi sa yuta ang mag-inahan sa barangay Malawitan pasado 7:00 sa miaging gabii.
Sa datos nga gihatag ni RDRRMC-xi Spokesperson Franz Irag, mukabat na sa 40 ka gambalay, upat ka pampubliko nga tulonghaan ug ang Magsaysay Municipal Hall ang nadamyos sa maong tremor.
Nag-crack usab ang Cor Jesu College ug Gaisano Mall sa Digos samtang nahugno ang bag-ong tinukod nga balay ug upat ka andana sa Mariano Peralta National High School sa lungsod sa Malita, Davao Occidental.
Sa maong panghitabo, mukabat sa tulo ang patay ug kapin 20 ang angol nga parehong nagpaalim pa sa pribado ug pampublikong ospital kagabii.
Matud ni Irag, hangtud karon dili pa nila mahatag ang kinatibuk-ang damyos sa insidente kay wala pa mahuman ang ilang ginahimo nga assessment sa mga naguba nga mga gambalay.
Sumala ni Irag nga may igong ihap sa mga evacuation centers ang matag lokalidad sa rehiyon alang sa mga biktima sa mga kalamidad sama sa linog kagabii.
Giangkon sa tigpamaba sa calamity watchdog group nga walay makasiguro sa kaugalingon nga siya makalikay sa kalit nga paghampak sa trahedya ilabi na nga wala pa’y ekipo nga na-imbento nga may kapasidad sa pag-detect sa linog.
Maong subling gidasig sa opisyal ang publiko nga seryosohon ang mga pagbansay sama sa earthquake drills nga ilang ginahimo sanglit walay ni usa ang nasayod kanus-a mubalik og tay-og ang kayutaan.
RadyoMaN Joel Viray
