LA CASTELLANA – Trending karun sa social media kag sa banwa sang La Castellana ang mga estudyante sang La Castellana National High School (K-12) matapos nga nagbulig sa isa ka Lolo nga nagalibot sa pagbaligya sang paninda kaangay sang lumpia kag banana cue sa ila eskwelahan.
Sa isa ka Ka FB post ni Aira King, iya ginshare kung paano nila nabuligan ang isa ka Lolo.
Suno sa ila, 2nd period kag vacant nila sang nagpanaug sila gikan sa 3rd floor sang amu nga eskwelahan kag nasugata nila ang isa ka Lolo nga may bitbit nga mabug-at nga inugbaligya.
Dugang pa nila, gusto kun tani ni Lolo nga magsaka pa sa 4th floor sang amu building para maubus ang iya baligya apang halata nga indi na niya masarangan kag nagadukoy-dukoy na ini sa kabug-aton kag katigulangon.
Ginpakamaayu nila nga tanyagan si Lolo nga sila nalang malinud sang iya baligya.
Nagaduwa-duwa man sang una si Lolo apang sang ulihi nagpasugut nalang ini.
Naubos ang paninda ni Lolo matapos nga ginlibod sang mga estudyante sa ila mga maestra, maestro kag kasubung nga mga estudyante sa ila school campus.
Ginkalipay naman ni Lolo ang pagbulig sang mga estudyante sang amu nga buluthuan sa iya.
Nagapakita lamang ini sang maayo nga pamatasan natun nga mga Pinoy, ilabi na ang pagrespito sa katigulangan sang pamatan-on apisar pa sa ginasiling nga impluwensya sang teknolohiya sa bag-ong henerasyon ukon millennials. / Aira King photos/Franklin Toledo/Aubrey Junsay/Sheena Batallon/Pepaii Nietes
