Davao city – Patay diha-diha ang usa ka tribal leader human gibanhigan sa gitohoang mga sakop sa teroristang CPP-NPA-NDF sa lungsod sa Lianga, Surigao Del Sur kagahapong adlawa.
Nabalot sa samad-pinusilan ang lawas resulta sa kamatayon sa biktima nga mao si Datu Hawudon Jumar Bucales, IPMR sa Lianga, Surigao Del Sur human gipaulanan og bala sa mga armado ang gisakyan.
Gikan sa IP Council meeting ug pauli na unta ang biktima apan pag-abot sa Sitio Mamprasanon, Barangay Banahao, kalit na lamang siya gibanhigan sa mga teroristang NPA.
Sa maong panghitabo, patay sab ang mga kauban ni Datu Bucales nga giilang sila Alberto Dela Pena ug Artemio Muldez tungod sa daghang igo sa ilang kalawasan.
Nasayran nga si Datu Bucales maoy nanguna sa pagkondena sa niluog nga binuhatan ug nakigbisog sa katungod sa mga lumad gikan sa abuso sa teroristang CPP-NPA-NDF sa mao nga lungsod.
Usa sab si Datu Bucales sa nangusog nga masirad-an ang Tribal Filipino Program of Surigao Del Sur ug Alternative Learning Center for Agriculture and Livelihood Development kon ALCADEV human nasuta nga ang naasoy nga mga tulonghaan nahimong breeding ground sa cadre ug mga NPA.
Si Datu Bucales ang nahimong instrument sa pagkatukod sa mga eskwelahan nga iya sa Department of Education human nasirad-an ang TRIFPSS ug ALCADEV ug pagpasar og mga resolusyon alang sa kalamboan sa ilang mga dapit.
Ubos sa liderato ni Datu Bucales, napakusgan ang End Local Communist Armed Conflict sa gobyerno sa Lianga nga hugot gisupak ni Bayan Muna Representative Cullamat kinsa igsoon sa Communist Terrorist Leader nga naglihukan sa nasambit nga lungsod.
Gihagit karon ni Lianga Tribal Chieftain si Congresswoman Cullamat nga kondenahon ang teroristang CPP-NPA-NDF tungod sa ilang pagpatay kang Datu Bucales.
RadyoMaN Joel Viray
