Ginpatawag kahapon ni acting City Mayor Joe Espinosa III ang mga Principal kag tribe Managers sang mga tribu sa ati-ati contest upod sa kapulisan kag sa chairman sang committee on women and children nga si Councilor Day Lee Zulueta Salazar.
Ini agud kumpirmahon kon matuod nga may mga kabataan nga miyembro sang mga tribu ang nagakagab-ihan sa pagpauli sa ila mga puluy-an.
Sa nasambit nga sinapol, may pila ka mga bagay nga nahisugtan agud mahibaluan nga miyembro sang tribu ang mga kabataan nga maaktuhan nga nagalakat sa mga dalanon sa dis-oras sang kagab-ihon.
Isa sa nahisugtan amo ang paghimo sang unified ID para sa mga tribe members agud indi sila pag-irescue kag dal-on sa presinto sang mga pulis.
Subong man, dapat makapauli na ang mga ini isa ka oras pagkatapos sang ila praktis bangud kon maaktuhan pa ang mga ini sa mga dalanon nga sobra na isa ka oras nga natapos ang praktis, makabig na nga paglapas sa curfew for minors kag pagadal-on na sila sa presinto agud i-rescue.
Ang nasambit nga tikang ginhimo sang siyudadmatapos matalupangdan nga madamo sang kabataan ang na-rescuie kag ang rason sang mga ini nga naga-praktis sila para sa Dinagyang.
