Patay ang isa ka tricycle driver matapos gintiro sang riding in tandem sa Barangay Pal-agon, Sta. Barbara, Iloilo mga alas 6:40 subong nga gab-i (Marso 14).
Ginkilala ang biktima nga si Victorino Sokitoso, 54 anyos sang barangay Amparo, Pavia, Iloilo.
Ginpahayag ni Police Major Raymund Celoso, hepe sang Sta. Barbara PNP nga base sa ila imbestigasyon, may nabaton nga tawag sa cellphone ang biktima kag gilayon ini nga naglakat sakay sa iya ginamaneho nga tricycle kag pag-abot sa Barangay Pal-agon, Sta. Barbara, may duha ka lalaki nga nagasakay sa motorsiklo ang nagtiro sa iya sang makapila ka beses.
Nakaagum sang pilas sa nagkalain-lain nga parte sang lawas ang biktima kag gindala sa Western Visayas Sanitarium Hospital apang gindeklarar nga napatay mga alas 7:20 sang gab-i.
Gina-imbestigahan sang Sta. Barbara PNP ang motibo sa pagpatay sa biktima bangud wala man ini sang background sa illegal nga druga kag wala sang record sa kapulisan.
