iFM Laoag – Naiyuswatan ti anti-illegal drug buy-bust operation iti maysa a tricycle driver iti Sitio Nagcalaoan, Brgy. Tabug Batac City Ilocos Norte babaen ti nagkooperar nga operasion iti PNP Batac, PNP San Nicolas ken iti PDEA Ilocos Norte idi kalman Pebrero 17, 2020.
Nabigbig ti subject iti operasion a ni Alymer Sacarias Abdon y Del Rosario, 59, naasawaan, maysa a tricycle driver ken residente iti Brgy. 8 Acosta iti metlaeng nadakamat a siudad.
Segun kenni Pol. Lt. Col., Michael Agoncillo iti Chief of Police ti PNP Batac, ti subject ket maibilang ti street level target ken tawen 2016 a naibilang kas drug surrenderer.
Narekobre kenkuana iti agdagop ti uppat a sachet ti maipagarop a shabu, 2 a sachet ti nagatang iti nagpammarang kas posuer buyer nga agbalor ti P1,000.00, 2 met a sachet ti narekobreda iti bulsana nga agbalor metlaeng ti P1,000.00, marked money a P500.00, cash a P5,820.00, 1 unit Yamaha tricycle a nausar iti transaksion.
Naglikodan met ti suspek iti alegasion kontra kenkuana ken saanna nga inadmitir a bagina dagiti nakompiskar, kasta pay nga inpatangkenna nga awan ti aniaman nga actibidadna iti iligal a droga.
Nagtalinaed ti suspek iti Mariano Marcos Memorial Hospital and Medical Center iti siudad ti Batac gapu iti hypertension ken inabiso iti attending physician a ni Dr. Jumelyn Cardenas nga agnaed paylaeng iti ospital apaman a mamonmonitor.
Nakabantay dagiti otoridad iti ospital ken manamnama a maipila ti reklamo iti suspek ti panaglabsingna iti RA 9165 wenno iti Comprehensive Dangerous Drugs Act of 2002 nu man bilang madischarge daytoy iti ospital ken maipakustodiar iti PNP Batac. (Joe Anne Agustin, RMN News)
