Isa ang patay kag duha ang pilason sa nagluntad nga vehicular accident sa barangay Cansilayan, Pototan, Iloilo mga alas 3:50 kaina sang hapon (Enero 25).
Ginkilala ang napatay nga si Francisco Catera, legal ang pang-edaron kag pumuuyo sang Barangay Monpon, Barotac Nuevo, Iloilo samtang ang mga pilason amo ang mag-asawa nga Nemesio, 67 anyos kag Ruperta Tabuada, 64-anyops, pumuluyo sang Barangay Culob, Pototan, Iloilo.
Sa imbestigasyon sang Pototan PNP, ginpahayag ni Police Staff Sgt. Mark Parrenio nga nagasunod ang Road ranger nga pick up nga ginamaneho ni Bartolome Aricaya Jr. sang Tuburan, Pototan sa tricycle nga ginamaneho ni Nemesio Tabuada sang nagtuyo ini nga mag-overtake.
Subong man gulpi lang nga nagliko pa-wala ang tricycle kabangdanan nga nabungguan ini sang Ford ranger.
Lunsay napilasan ang sakay sang tricycle kag ginpangdala sa Iloilo Provincial Hospital sa Pototan apang ginbawian gid sang kabuhi si Catera bangud sa patal nga pilas sa ulo samtang ginsaylo naman sa ospital sa siyudad ang mag-asawa nga Tabuada.
Sa karon , na-detain sa Pototan Police station ang driver sang Ford nga si Aricaya kag ginahulat sang kapulisan ang pamilya sang mga biktima kon pasakaan ini sang kaso.
