Patay ang driver sang tricycle matapos makabunggo sa kasugata sini nga truck sa kalabaon sang Palmares St. sa siyudad sang Passi, pasado alas 8 sini lamang nga gab-i.
Gindeklarar nga dead on arrival sa ospital ang biktima nga ginkilala kay Arnold Patino, 23 anyos sang barangay Gines Viejo, Passi City matapos wasak gid ang ulo sini sang makabunggo sa truck nga ginamaneho ni Celso Jomeres, 58 anyos sang Bitoon Ilaya, Cuartero, Capiz.
Suno kay Police Lt. Col. Arturo Fullero, hepe sang Passi City PNP nga mga alas 8:15 sini nga gab-i samtang nagamaneho sang tricyle ang biktima padulong sa URC sang makabunggo ini sa truck nga nagapadulong naman sa banwa sang San Enrique kag sa kabaskog sang impacty , nagtabug ang biktima sa karsada kon sa diin nag-igo sa semento ang iya ulo.
Samtang nalab-ot man sang tricycle ang gin asundan sini nga Isuzu D-max nga ginamaneho ni Prudencio Hofilenia.
Yara na karon sa custody sang Passi City PNP ang driver sang truck kag posible pasakaan sang nagakaigo nga kaso.
