CAUAYAN CITY- Binawian ng buhay ang isang lalaki matapos makabanggaan ang isang dump truck at lumiyab ang kanyang sinasakyang tricycle sa Brgy. San Pablo, Cauayan City, Isabela.
Kinilala ang biktima na si alyas “Jerry”, 46-anyos, at residente ng Brgy. Gappal, Cauayan City, Isabela.
Batay sa pagsisiyasat ng pulisya, binabaybay ng dalawang behikulo ang magkasalungat na direksyon kung saan pagdating sa pinangyarihan ng insidente, sinubukang iwasan ng tricycle ang nakatambak na lupa sa kalsada dahilan upang pumasok ito sa linya ng dump truck.
Dahil dito, nagbanggaan ang dalawang behikulo dahilan upang bumaliktad at tumagas ang gasolina ng tricycle na nagresulta sa pagliyab ng apoy at masunog ang katawan ng biktima.
Samantala, ayon sa PNP Cauayan nagkaroon na umano ng inisyal na pag-uusap ang dalawang panig hinggil sa nangyaring insidente.
