Salug, Zamboanga del Norte – Patay ang usa ka pasahero samtang angol ang drayber dihang nabalintong ang ilang gisakyan tricycle sa kamulong construction na kalsada pasado alas 6:30 sa miaging gabii didto sa National Highway Barangay Caracol, lungsod sa Salug, ning lalawigan sa Zamboanga Del Norte.
Sa nahipos nga kasayuran gikan sa Salug Municipal Police Station, naila ang pasaherong namatay nga si Marlon Cervantes Cuenca, 50 anyos minyo usa ka mananagat, nga taga Barangay Lipakan, samtang angol ang drayber nga si Bobby Gaballo Callao, 42 anyos nga taga Barangay Poblacion sa maong lungsod.
Migawas sa imbitigasyon sa kapolisan, nga kusog ang pagpadagan ni Callao sa gimaniho niining tricycle nga gikatahong walay headlight, sakay ang pasaherong si Cuenca, gikan nagbiyahe sa barangay Poblacion paingon unta sa barangay Lipakan, apan pagabot nila sa dapit nahitaboan wala namatikdi sa drayber ang dalan na under construction hinongdan sa pagkabalintong.
Ang pasahero nga si Cuenca maoy nagrabihan diin gideklar nga dead on arrival sa nag-atiman nga doktor sulod sa Liloy Integrated Health District Hospital human nakahiagom ug head injury.
Samtang ang drayber nakaagon ug samad sa dagway ug agol sa nagkadaiyang bahin sa lawas ug padayon pa nagpaalim sa nahiagoman.
