Davao City – Nanawagan karon ang City Transport and Traffic Management Office (CTTMO) nga pahimuslan ang nagapadayong registration sa mga trisikad ug motorized tricycle for hire sa mga barangay sa syudad sa pagpanguna sa buhatan.
Sa pagkighinabi sa DXDC RMN Davao kang Gemma Guhao, trisikad in-charge sa CTTMO, gibutyag niini nga sa unang duha ka adlaw sa ilang gihimong registration, gatusan na ang nagparehistro direkta sa ilang mga barangay.
Nagpahimangno si Guhao nga kung pakyas nga makapa rehistro ang nahisgutan sulod sa timeline nga gihatag sa buhatan, ila gilayon kining aksyunan pinaagi sa pagpanakop diin adunay timailhan ang CTTMO nga narehistro na ang usa ka sakyanan.
“Magpa rehistro gyud sila sa among gihatag nga timeline. Para ra man pud na sa ilang kaayohan. Kung balewalaon ra nila among gi-implement nga “one stop shop” sa matag barangay, luoy kaayo sila pag magdinakpanay na.” segun niini.
Nasayran nga 32 ka mga barangay nga adunay mga trisikad ang gisugdan sa pag regulate sa CTTMO diin nagsugod kini niadtong Abril 4 ug mulungtad hangtud sa Hunyo 19 karon nga tuig.
RadyoMaN Kirby Manzon
