Wala pa nagpagwa sang desisyon ang Makati City Regional Trial Court Branch 148 sa mosyon sang Department of Justice nga naghinyo nga dagdagan sang alias warrant kag hold departure order si Senator Antonio Trillanes IV.
Sandig sa order nga ginpirmahan ni Presiding Judge Antonio Bartolome Soriano, ginhatagan sini sang 10 ka adlaw ang kampo sang senador para mag-file sang supplemental comment kag rejoinder sa una nga komento sang DOJ angut sa resolusyon sang Korte Suprema.
Samtang ginahatagan naman sang lima ka adlaw sang korte ang prosekusyon para magpasa sang komento sa inugpasa nga mga dokumento ni Trillanes.
Matandaan nga nag-file ang DOJ sang mosyon sa Branch 148 kasunod sang pagbawi ni Pangulong Rodrigo Duterte sang amnestiya sang senador nga ginhatag naman sang Aquino administration. -RCSG/iFM Bacolod
