Ginkumpermar ni Senator Antonio Trillanes nga nagpirma sya sang waiver sa 12 ka bank accounts nga ginaangut sa iya.
Kadungan sini ginhangkat niya si Pres. Rodrigo Duterte nga himuon man ang kaangay nga lihok.
Suno kay Trillanes nahibaluan lamang niya ang ginaalegar iya accounts sa Duterte supporter journalist nga si Erwin Tulfo, sa The Mocha Uson blog kag Davao Breaking News website nga iya ginlaragway nga ginahalinan sang fake news.
Ginpahayag ni Trillanes nga ang waiver nagahatag sang pahanugot sa anti-money laundering council kag Ombudsman.
Paathag ni Trillanes gusto niya ipakita nga wala sya sang may ginatago.
Nahibaluan nga ginahangkat ni Trillanes si Duterte kag anak sini nga si Paolo kag umagad nga si Mans Carpio nga magpirma sang waiver agud matan-aw ang ila bank accounts.
Sadtong election ginbuyagyag man sini ang minilyo ka pesos nga deposits ni Duterte sa BPI kag ginhangkat nga magpaggwa sang waiver apang wala ini ginbaton ni Duterte.
