Cauayan City, Isabela – Timbog sa kamay ng kapulisan ang isang truck helper sa Cauayan City dahil sa patuloy na pagbenta ng shabu sa lungsod.
Sa impormasyong nakalap ng RMN Cauayan sa Cauayan City Police Station, kinilala ang tulak ng droga na si Jaime Limon, apatnaput walong taong gulang, may asawa at residente ng Goronia Street, San Pablo, Aurora, Isabela.
Naaresto si Jaime Limon sa isinagawang drug buy bust ng pinagsanib na pwersa ng PNP Cauayan City at PDEA sa Barangay San Fermin Cauayan City kung saan nakuha sa pag-iingat nito ang isang pakete ng shabu, isang libong piso at tatlong piraso ng isang daang piso bilang marked money.
Dahil dito inihanda na ang kasong paglabag sa RA 9165 o Dangerous Drugs Act laban kay Jaime Limon na nasa piitan na ng Cauayan City Police Station.
