Truck nga dunay kargang bugas naaksidente, tulo patay, lima samaron

Labangan, Zamboanga del Sur – Nagpasad sa kalsada sa National Highway Upper Pulacan, Labangan, Zamboanga del Sur ang lugas sa mga bugas human maaksidente ang sakyanan nga dunay kargang sinakong bugas nga dalhon unta sa Ipil, Zamboanga Sibugay alas 7:55 sa niaging gabii November 15, 2021.
Base sa report sa Labangan Municipal Police Station Traffic Division, pabahada ang Isuzu truck dihang kalit nga nawad-an og control ang driver nga si Ernesto Tudtud Ramirez, 59-anyos nga taga-Navalan, Tukuran niining probinsya.
Gumikan sa kabug-at sa karga nga 480 ka sakong bugas ug pulo ka pasahero, nabangga niya ang sakyanan sa kilid sa kalsada nga kabatuan ug konkreto rason nga nangayabo ang mga sakay ug bugas nga karga.
Guba ang atubangan sa truck ug patay ang mga sakay nga sila si Esmeralda Roño Cabrobias, 57-anyos, Jobirth Roño Cabrobias, 38-anyos, ug ang 12-anyos nga si Joemar Roño Cabrobias.
Ang tropa sa 1st Cavalry Battalion ang unang nakaresponde sa lugar nga maoy nidala sa lima ka biktima nga samaron sa pinakaduol nga balay tambalanan.

Facebook Comments