Davao City – Gikumpirma ni Kapitan Lito Lapitan sa Barangay Tigatto nga kontaminado ug dili na luwas nga inumon ang tubig gikan sa bomba (pitcher pump) ug balon sa Purok 10, Sitio Balon, Barangay Tigatto, Buhangin, Davao City.
Sa interbyu sa DXDC RMN Davao kang Lapitan, kini ang nahimong resulta sa imbestigasyon sa Department of Health (DOH)-XI human gikuhaan og sample ug testing sa tubig sa lugar.
Gibutyag ni Lapitan, ang mga kasilyas ug kulungan sa baboy ang hinungdan nga nagpositibo sa bacteria ang tubig nga gina-inom sa mga residente sumala sa Department of Health.
“Kay kana man gud daw, kinahanglan man gud ana muabot og mga 25 meters kung aduna kay mga CR (comfort room) o kaya kulungan sa baboy. So, tendency gyod daw nga pag-absorb ana sa tubig muabot gyod daw dito sa ginagamit nila,” butyag sa opisyal.
Sa pagkakaron, hingpit nang gidili ang pag-inom og tubig aron malikayan ang balatian ug girekomenda usab sa DOH-XI ang pag-demolish sa mga balon ug bomba sa maong lugar aron dili na gayud magamit sa mga residente.
Kahinumduman, upat (4) ka mga residente sa lugar ang namatay human nakasinati og diarrhea ug ang tubig sa lugar ang gitudlong hinungdan sa insidente.
RadyoMaN Kirby Manzon
