Davao City – Girekomendar karon sa Trade Union Congress of the Philippines (TUCP) Partylist sa gobyerno nga undangon na pagpadala sa mga Pilipino sa ubang kanasuran gumikan sa nadangatan sa pinay nga gipatay ug gisulod sa freezer sa mga employer didto sa Kuwait.
Matud ni TUCP Spokesperson Alan Tanjusay nga panahon na aron rebyuhon sa gobyerno ang palisiya ug tun-an kun angay pa ba magpadala og mga Pilipino sa laing kanasuran aron manarbaho human sa brutal nga makatayon ni Joanna Dimapilis nga taga Iloilo didto sa Kuwait.
Segun ni Tanjusay, igo na nga basehan ang daghang abuso ug pagkamatay sa mga OFW aron did-an ang mga Pilipino nga manarbaho sa ubang mga nasud ug labaw na sa tungang sidlakan kung asa natala ang grabe nga pangabuso sa mga Pinay nga mga domestic helpers.
Duha ka tuig nahimong OFW sa nasud Qatar si Glenda Baloca ug matud niya ang tan-aw sa mga Arabo sa mga Pinay nga nanarbaho sa ilang mga nasud sama sa mga Commercial Sex Workers (CSWs).
Walay respeto ang mga Arabo sa mga Pinay tungod kay unang-unang ubos na kaayo ang ilang tan-aw sa mga taga-Pilipinas ug makaluluoy kaayo ang mga domestic helper kay gawas nga mabiktima sa abuso pulipulihan pa gyod og lugos ug ang pait patyon nga walay maangkon nga hustisya.
Busa pabor kaayo si Baloca sa lakang sa gobyerno karon nga magpatuman og total deployment ban sa Kuwait sa ingon wala nay pinoy ug pinay makatagamtam sa kabangis ug ka-walay kaluoy nga mga agalong arabo sa Tungang Sidlakan.
Maagni lang sa gobyerno ang mga Pilipino nga dili na mag-abroad kun maseguro sa kagamhanan ang malamboon nga ekonomiya, proteksyon sa trabaho ug taas nga sweldo ug mga benepisyo.
Positibo si Tanjusay nga kun mabuhat kana sa kagamhanan, wala nay mga Pilipinong mulangyaw aron manimpalad sa laing nasud ug wala na unya’y mga Pinoy ug mga Pinay nga maabuso ug mamatay sa kamot sa mga langyaw’ng mga agalon sama sa mga Arabo.
RadyoMaN Joel Viray
