Davao City – Nabalaka karon ang Associated Labor Union-Trade Union Congress of the Philippines (ALU-TUCP) nga basin maipit ang gatusan ka mga Overseas Filipino Workers (OFWs) ugaling moulbo ang giyera tali sa Estados Unidos ug sa Islamic Republic of Iran.
Sumala ni TUCP Spokesperson Allan Tanjusay, dili halayo ang posibilidad nga mosangpot gayud sa gubat kun ‘shooting war’ ang padayon nga tensyon karon tali sa Amerika ug Iran diin malagmit usab nga mapagan ang mga trabahanteng Pinoy nga nanarbaho karon sa Iran ug silingang mga dapit .
Gikuyawan si Tanjusay sa modernong armas-igugubat ug nuclear weapons nga sa dugay’ng panahon gitipigan ug karon posibleng parehong gamiton sa Amerika ug Iran nga mga nuclear powers sa kalibutan karon kung dili gayod molurang ang nagpadayong tensiyon-militar.
Ug kung mosilaob ang World War III nga magsugod sa bangi sa duruha ka mga nasud, mas makalilisang unya ang dangatan sa atong sibilisasyon karon tungod sa advanced kaayo nga mga war heads nga lagmit gamiton sa giyera lakip na ang scenario sa usaka makalilisang nga fatal thermonuclear war nga lagmit motapos sa human species.
Busa, pabor si Tanjusay nga karon pa lang hakuton na sa nasudnong gobyerno ang gatusan ka mga OFWs nga nanabarho sa Iran pabalik dinhi sa nasud aron dili maipit sa binigwasay unya sa Estados Unidos ug Iran.
Mapasalamaton ug gidayeg sa tigpamaba ang Duterte administration gumikan sa paspas nga pag-aksyon ug pagpangandam aron i-rescue ang mga Pilipinong trabahador nga anaa karon sa mga war zones.
Kahinumdoman nga gi-akusahan ni US President Donald Trump ang Iran nga anaa sa likod sa pagpang-atake sa US Embassy sa Baghdad, Iraq maong nibalos ang Amerika pinaagi sa air strikes nga gikamatay sa top Iranian general ug war hero.
Hinoon supak si Tanjunsay nga papaulion ang tanang mga OFWs sa Middle East ug ubang mga nasud sa kalibutan inay ang mas maayong buhaton mao ang papatuman sa istrikto nga mga palisiya maingon man ang pagpakig-alayon sa gobyerno sa Pilipinas ug sa gobyerno sa Middle East aron wala na’y mga Pinoy workers nga maabusohan ingon man makasinati og pagmaltrato sa kamot sa ilang mga abusadong langyaw’ng agalon.
RadyoMan Joel Viray
