Davao City – Patay ang driver sa usa ka motorsiklo human na ratsadahan kini sa laing motor nahitabo Lunes sa gabii sa Purok 2, Tugbok Proper, Tugbok District, Davao City.
Naila ang biktima nga si Rodel Barrera kinsa driver sa Yamaha motorcycle diin angkas niini si Wilfredo Singco Jr., 34 anyos, usa ka pintor kinsa pulos residente sa Purok 14 Upper Tugbok, Tugbok District, Davao City samtang sakay sa Honda motorcycle si Jovert Guc-ong, 19 anyos, taga Purok 7 Manuel Guianga, Tugbok District, Davao City, ug way lisensiya.
Migula sa imbestigasyon sa kapulisan nga naglawig ang Yamaha motorcycle paingon Calinan samtang padulong Ulas ang Honda motorcycle apan pag-abot sa nasangpit nga lugar, paliko sa wala nga bahin na unta ang Yamaha padulong Upper Tugbok diin kalit kining nabanggaan sa naghaguros nga Honda motorcycle ug miresulta sa pagkabalintong sa mga nalambigit kinsa nakahiagom og daghang samad sa kalawasan.
Daling gidala sa Mintal Holy Spirit Hospital si Barrera kinsa gideklarang patay alas-9:40 sa gabii samtang gidiretso sa SPMC ang driver sa Honda ug angkas sa Yamaha.
Kasong Reckless Imprudence Resulting in Homicide, Serious Physical Injury ug Damage to Property ang atubangon sa nakabangga nga motorsiklo.
RadyoMaN Jason Amisola
