Plano nga ipaidalum sa DNA test ang mga tul-an nga nakit-an sa kakahuyan sang barangay Adgao, Tubungan, Iloilo kahapon sang aga, Agosto 26.
Ini agud labi nga makumpirmar sang pamilya nga iya ini sang ila anak nga dalagita nga duha ka tuig na nga ginapangita.
Una na ginpahayag ni Pol. Lt. Jose Rommel Samson sang Tubungan Municipal Police Station nga nakilala ang identity sang tul-an bangod sa nakit-an nga ID nga may picture sang napatay, pula nga bag sini nga nasab-it sa kahoy sang lumboy kag puti kag blue nga striped uniform sang Camanggahan National High School nga sakop na sang Guimbal sa diin naga-eskwela ang bata.
Ginkumpirmar naman sang amay nga si Agustin Tagnawa nga ang tul-an iya sang anak nga si Gellen Tagnawa, 13 anyos ang edad sang ginreport nga na-missing halos duha ka tuig na ang nakalipas kag nagasantu man ang description sa mga narecover nga gamit sa ila nga ginpa- blotter sadto sa PNP.
Padayon nga ginapadalman sang mga kapulisan ang ila imbestigasyon natuhoy sa nasapwan nga mga tul-an bangud suno kay Pol Lt. Jose Rommel Samson, may indikasyon nga ginlubong ang dalagita.
