Kumalarang, Zamboanga del Sur – Tulo ka mga barangay ang gikuso-kuso buhawi sa lungsod sa Kumalarang niining probinsya sa Zamboanga del Sur. Kini ang gikompirma ni Municipal Disaster Risk Reduction Management Council (MDRRMC) action officer Henry Hadcan.
Subay sa report, moabot sa 8 ka mga balay ang giguba sa pag-hapak sa buhawi nga nakaapekto sa Barangay Buyugan West ug Salagmanok.
Naapektuhan usab nagtuyok-tuyok nga hangin ang tulunghaan sa Brgy. Lantawan sakop gihapon sa lungsod sa Kumalarang diin gihigok sa hangin ang atop hinungdan sa pagkalangkat niini.
Nakasinati usab og pagkapalong sa kuryente ang tibuok lungsod sa Kumalarang human sa pag-igo sa buhawi sa lugar.
Hinuon, gikompirma sa MDRRMC nga walay mga namatay o nasamdan sa panghitabo gawas lamang nga nakahatag kini og kahadlok sa mga residente.
Sa kasamtangan, temporaryo unang gipahiklin ang mga residente nga apektado samtang nagpahigayon pa og validation ang mga social worker sa dapit.
Photo Credit to Kumalarang MDRRMC
