Tulo ka lalaki, patay human misukol sa kapulisan sa Misamis Oriental

100

Patay ang tulo ka mga lalaki sa Purok 1, Barangay Sinai, Laguindingan, Misamis Oriental human misukol sa kapolisan mga alas 10:55 kagabie.

 

Matud ni Senior Inspector Rorye Tabuclin, Hepe sa Laguindingan Municipal Police Station nga naila ang mga suspek nga silang Dodong ‘’Dongpin’’ Pindulangan, 40 anyos, Carlo Dagundon, 30 anyos, ug Rongque John Lago, 40 anyos residente sa nasangpit nga dapit.

 

Dugang pa ni Senior Inspector Tabuclin nga kauban nila sa operasyon ang Provincial Intelligence Branch, Provincial Drug Enforcement Unit, Alubijid Municipal Police Station, Libertad Municipal Police Station, ug 1st Provincial Mobile Force Company.

 

Nasayran nga target sa pag-serve sa search warrant si Pindulangan apan pag-abot sa kapolisan sa panimalay sa suspek, nataymingan nga anaa usab didto silang Dagundon ug Lago.

 

Samtang una matud pa nga mibunot ug nagpabuto sa iyang improvised nga armas ang suspek nga si Carlo Dagundon.

 

Matud ni Senior Inspector Tabuclin nga mibunot usab og granada si Lago apan maayo na lang kay daling nakaresponse ang kapolisan ug naunhan nila pagpusil ang mga suspek.

 

Nasayran nga naangkon sa mga suspek ang samad pinusilan sa tiyan ug dughan nga maoy hinungdan sa ilang kamatayon.

 

Sa karon gibutang na sa usa ka punerarya sa Alubijid, Misamis Oriental ang mga suspetsado.

Facebook Comments