Dimataling, Zamboanga del Sur – Dead on the spot ang tulo ka lalaki human gibanhigan alas 6:10 kagahapon sa buntag didtong dapita sa Purok 6, Sitio Quary, Brgy. Kagawasan sakop sa lungsod sa Dimataling ning probinsya sa Zamboanga del Sur.
Tatad sa bala ang lawas sa mga biktima nga sila si Saddat Bongga, 42 anyos , magtutudlo , Sammer Bongga, 37 anyos, negosyante ug Sadam Lam, 28 anyos, nanagat ug pulos residente sa Purok 1, Sitio Banghouse, Brgy. Poblacion sakop sa nahisgutan nga lungsod.
Base sa impormasyon nga nakuha sa RMN Pagadian gikan sa Dimataling Municipal Police Station, sayo sa buntag gi-atangan ang mga biktima sa lima ka suspetsado ug tulo niini nagsul-ob og uniporme sa pulis.
Nahipos gikan sa dapit nahitabuan ang 64 ka basiyo bala sa M16 rifles ug walo ka basiyo sa 9mm nga pistola.
Sa inisyal nga imbestigasyon sa wala pa nahitabo ang pagpangambush dunay Toyota Vios, color Off white ang nakaplastar sa lugar nga gisakyan sa mga suspek nga armado sa tag-as nga armas.
Pipila ka minutos ang nilabay, niabot ang mga biktima sa lugar nga sakay sa motorsiklo diin daling nipaboto ang mga armadong kalalakin-an sa makadagahan nga higayon hinungdan sa ngil-ngig nga kamatayon sa tulo ka biktima.
Dugang sa taho nga nahipos ning sibyahan wala pa makontento ang usa sa mga mamumuno gikuha pa niini ang calibre 45 nga pistola nga gipanag-iyahan ug gidala-dala sa biktima nga si Sammer Bongga ug giunay pagpusil sa tag-iya sa unom ka higayon.
Naglusad na og hot pursuit operation ang kapulisan aron sa posibleng pagsikop sa mga suspek.
