Tulo ka patayng lawas, nakit-an sa Bukidnon

Tulo ka patayng lawas sa tawo ang nakit-an pasado alas tres kagahapon sa hapon sa lasang nga dapit sa Sitio Saray, Bagong Silang, Sta. Ines, Malitbog, Bukidnon.

 

Ang tulo ka mga patay, positibong gi-ila sa ilang mga pamilya nga silang Don Remar Andales, 23 anyos, Vincent Viemer, 24 anyos ug Clifford Abales, 21 anyos nga pulos taga Barangay Tambobong, Villanueva Misamis Oriental.

 

Matud ni Maria Endan Andales nga inahan ni Remar Andales nga  gi-pick-up ang iyang anak sa mga police sa Tagoloan mga alas otso sa gabie niadtong Dominggo sa balay ni Rosemarie Pantonial sa Zone 4, Tagoloan, Misamis Oriental.


 

Lakip sa gi-pick-up sa mga police sa Tagoloan sa Balay ni Pantonial ang mga barkada ni Remar nga silang Vincent Viemer ug Clifford Abales.

 

Si Rosemarie, barkada usab  nila Remar, Vincent ug Clifford.

 

Nangaon ang tulo ka mga biktima sa balay ni Rosemarie sa dihang gi-pick-up sila sa mga police operatives sa lungsod sa Tagoloan.

 

Matud ni Maria Andales nga ang iyang anak nga si Remar ug ang iyang duha ka barkada nga silang Vincent ug Clifford pulos naay samad sa ulo nga agi sa bala sa pusil sa dihang nakit-an kining patay sa lasang sa Sitio Saray, Bagong Silang, Sta. Ines sa Malitbog, Bukidnon.

 

Dili pa masulti ni Mrs. Andales kinsay nagpusil sa iyang anak ug  sa iyang mga barkada nga sila Vincent ug Clifford.

 

Bisan si  Anita Abales nga inahan ni Clifford ug si Janet Viemer nga lola ni Vincent dili makatoo sa kalit nga kamatayon sa tulo ka mga bikitma.

 

Ang tulo ka patayng lawas, una kining nakit-an sa usa ka  lalaki nga nangahoy sa dapit diin nakit-an ang mga biktima nga patay na.

 

Matud ni Dr. Christian Caballes, Medico legal sa SOCO nga naa na sa state of decomposition ang patayng lawas sa tulo ka mga biktima.

Facebook Comments