Taga Cagayan de Oro City ang tulo ka mga sakay sa truck nga nahulog sa pangpang sa Bato Laki, Barangay Cruz, Glan, Sarangani Province mga alas 7 sa gabie niadtong Lunes.
Kini ang gipaabot nga impormasyon sa RMN General Santos City.
Ang mga biktima giilang silang Arman Caangay Sambas, Boyet Almonte ug usa ka ginganlan lang ug Darwin, driver sa truck, puros taga Cagayan De Oro City.
Matud ni Cruz Barangay Kagawad Darwin Campaan, gikan matud pa sa Jose Abad Santos, Davao Occidental ang mga biktima ug padulong unta sa Davao City apan pag-abot sa bahada nga bahin sa Barangay Cruz, nawad-an og preno ang truck busa nahagbong sa pangpang.
Daling gidala sa Glan Municipal Hospital ang mga biktima apan gidala sa Mindanao Medical Center ang biktimang si Arman Sambas tungod sa mga naangkong samad.
