Matud ni Geralde, niadto pang nakalabay’ng adlaw nasang-at sa piskalya ang kasong robbery with homicide batok sa mga kriminal nga giilang sila Barie Lozaga, Rodolfo Dabon Jr. ug Rosemarie Himpayan, pulos hamtong ang mga pangidaron.
Kahinumduman, sila Lozaga ug Himpayan nadakpan sa Digos City dihang misumbong ngadto sa mga awtoridad nga ang cellphone nga gipaayo sa mga suspek iya sa biktima nga ilang gitulis sa lungsod sa Hagonoy, Davao Del Sur.
Samtang si Rodolfo Dabon kinsa una nang naka-ikyas dihang nagpahigayon og operasyon ang Hagonoy Municipal Police Station, Matan-ao Municipal Police Station ug Davao Del Sur Provincial Police Office sa hideout sa Barangay New Katipunan, Matan-ao, kung asa ang igsoon niini nga si Joel Dabon napatay, dihang nakigpinusilay kini sa mga pulis niadtong Marso 25, 2023 ug nadakpan na sa usa ka Barangay sa lungsod sa Malalag, Davao Del Sur.
Matud ni Geralde, ugaling mosaka na sa korte ang kaso ug mogawas na ang warrant of arrest ingon man ang commitment order, ang tulo ka suspek ibalhin sa kulungan nga gipadagan sa BJMP.
Una nang gisulti sa Provincial Director, ang upat ka suspek maoy responsable sa sunod-sunod nga tulis ug panglugos sa upat ka mga lungsod sa entero probinsiya diin usa na ka tuig nag-operate.
Modus sa upat mao ang pagsulod sa mga balay nga anaa sa hilit nga lugar nga walay mga silingan ug sagad sila mo-ataki alas 12:00 sa tungang kagabhion kung asa ang mga ginang ug mga batan-ong babayi ginalugos sa mga suspek.
RadyoMaN Joel Viray
