Catbalogan City, SAMAR – Nadakop han Philippine Drug Enforcement Agency (PDEA) ngan Catbalogan City PNP an tulo nga estudyante nga nagbabaligya hin marijuana ha Sitio Patong Brgy. Guinsorongan, Catbalogan City, Samar.
Ha report han Catbalogan Pulis, ginkilala an mga nadakop nga estudyante nga hira Jhon Adrian Dauden Altamera alyas “Yan-Yan”, 21 anyos ngan residente ha P-8 Brgy. Canlapwas han mao nga syudad; Darwin Rosario Cabanganan, 23 anyos, ngan residente ha P-1, Brgy. San Pablo Canlapwas; Ranee Ralph Cabahug Gabon, 21 anyos ngan residente ha P-3 Brgy. Canlapawas.
Ha buy-bust operation han mga otoridad, napalit tikang ha mga suspek an upat nga folded white paper nga mayada sulod nga dried leaves nga gintutuuhan nga marijuana nga may kabug-at nga 4 grams nga nagkakantidad hin P500.00
Sumala han PDEA, maatubang an tulo nga estudyante ha mga kaso nga sale ngan possession of illegal of drugs.
Paslak na an tulo nga suspek ha PDEA Detention Facility.
