Tulo nga magclassmate sakay han single nga motor, patay

Sta. Rita, SAMAR – Dead on the spot an tulo nga kabataan matapos bumunggo an ira ginsasakyan nga single nga motor ha iginkatapo nga Grand Tours van ha Sitio Bugho Brgy. Dampigan Sta. Rita, Samar, ala 1:45 han kulop kakulop.

Ginkilala an mga namatay nga kabataan nga hira Alfred Francis Aucinte, 18 anyos, residente ha nasabi nga lugar; an iya naman mga backrider in hira Richard Villagracia Advincula, 18 anyos, ngan hi Ralp Caillo Advincula, 18 anyos ngan pareho nga residente ha Brgy. San Juan ha nasabi nga bungto.

Ginkilala naman an driver han Grand Tours van nga hi Bienvinido Gallego Brillante, 49 anyos, may asawa, ngan residente ha P6 JD Avelino St. Calbayog City, Samar.


Ha nagawas nga imbistigasyon han Sta. Rita PNP, an single nga motor nga ginsasakyan han mga kabataan in ginbabaybay an kakalsadahan tipakadto ha Catbalogan City, Samar samtang an van naman in tipakadto ha Tacloban City. Gin-aaligar nag-overtake an single nga motor ha nauuna nga truck ngan waray hisabuti han mga kabataan nga mayada nira katapo nga malaksi nga van, didto na nahinabo an aksidente.

Ha interview han RMN ha investigator han Sta. Rita PNP nga hi PO3. Almer Mirasol, waray driver’s licence hi Alfred Francis Aucinte, an driver han single nga motor.

Magkralasmeyt la an mga kabataan nga nangingiskwela ha Tominamos Integrated School ha Sta. Rita Samar.

Waray naman may nasamaran ha mga sakay han van.

Ha pagka-yana, paslak an an driver ha Sta. Rita PNP lock up cell.

Facebook Comments