Nag-negatibo sa COVID-19 ang tulo sa lima ka mga namatay sa Iligan City niini lamang bulan sa Abril.
Kini maoy gihatag nga update sa RMN Iligan ni City Health Officer Dr. Cherlina Caṅaveral human migawas ang resulta sa swab sa maong mga pasyente.
Kini nga mga pasyente mao ang mosunod:
1. Lalaking 40 anyos nga empleyado sa Barangay Dalipuga kinsa namatay niadtong Biyernes Santo, Abril 10 sa kadlawon tungod sa severe acute respiratory illness o SARI; gilubong kini sa sementeryo sa Dalipuga;
2. Ang 22 anyos nga babayeng magtutudlo sa usa ka tunghaan sa Iligan nga taga-Manticao, Misamis Oriental apan sa iyang boarding house sa Baragay Mahayahay kini naabtan sa pagsakit; namatay kini niadtong Abril 12 didto sa Northern Mindanao Medical Center sa Cagayan de Oro City. Una kining gidala sa City Hospital sa Iligan ang pasyente; gilubong kini sa sementeryo sa Manticao; miingon sa pamunuan sa iyang tunghaan nga “lupus complication” ang hinungdan sa kamatayon sa maong magtutudlo;
3. Ug ang 44 anyos nga babayeng taga-Barangay Suarez, kinsa namatay niadtong Abril 14 didto sa NMMC, gi-cremate kini didto sa usa ka crematorium sa Cagayan de Oro.
Ang 25 anyos nga taga-Barangay Mandulog, kinsa namatay niadtong Abril 14 wala pa migawas ang resulta sa iyang swab test; namatay kini sa Gregorio T. Lluch Memorial Hospital (GTLMH) ug gilayong gilubong sa Barangay Mandulog subay sa tradisyon sa Islam; SARI o severe acute respiratory illness ang gikamatyan niini.
Giklaro ni Caṅaveral nga ang namatay sa Barangay Buruun walay kalabutan sa COVID-19 ug patay’ng lawas na kini miabot sa Iligan gikan sa Manila.
Sa pagsulat ning balita, wala pa maapil sa record ni Caṅaveral ang taga-Purok 1, Barangay Tambacan, kinsa namatay sa GTLMH niadtong Biyernes, Abril 17. Aduna kini sakit nga tuberculosis.
Wala usab sa iyang record ang namatay niadtong Abril 6 nga taga-Barangay Tubod kinsa gilubong sa Pryce Gardens sa Barangay Sta. Filomena. (Divina Suson , IATF COVID Iligan, April 21)
