Davao City – Gipangita na karon sa Mati City Police Office ang tag-iya sa gi-abandono nga motor kansang maoy hinungdan sa pagkasunog sa kilid sa classroom sa Central 1 Elementary School nga nahimutang sa Barangay Central, Mati City, Davao Oriental.
Tulo na ka adlaw sukad gibilin sa wala mailhing tag-iya ang motor nga dunay plakang 1147 NT sa kilid sa classroom sa eskwelahan ug wala na baliki ug gikuha.
Pasado 1:00 sa kadlawon niadtong Sabado dihang nabantayan sa mga residente ang pagdilaab sa kalayo ang motor ug mihinay na og kuyanap sa classroom.
Dali nakaresponde ang mga sakop sa Bureau Fire Protection Mati City sa lugar hinungdan wala na makakalat sa tibuok gambalay ang kalayo hangtud nadeklarang fireout.
Naglusad na karon og imbestigasyon si SPO2 Edwardo Dabalos aron masayran ang rason sa pag-ulbo sa kalayo sa motor ug pila sab ang kinatibuk-ang damyos sa insidente.
RadyoMaN Joel Viray
