San Pablo, Zamboanga del Sur – Niduaw ug nang-apod2 ug libreng snacks ang RMN DXPR team ngadto sa mga kabataan sa usa sa mga tulunghaan sa lungsod sa San Pablo, ning lalawigan sa Zamboanga del Sur kagahapong adlawa. Kini atol sa kasaulogan sa King and Queen of Hearts 2019 sa Songgoy Elementary School nga nagdala sa tema: One school, one heart, one goal.
Ang naasoyng pagpang-apod2 ang gipanguluhan ni Station Manager Melchor “Mel” Coronel ilabina nga kagahapong adlawa halos tanang tulunghaan sa tibook nasud ang nagselebrar sa Adlaw sa mga Kasingkasing.
Ang programa ang gisugdan pinaagi sa pag-ampo sa may ala una ang takna sa hapon. Lakip sa mga mitambong si Dr. Roy Sanoria, ang HRDD Region 9, RMN DXPR team, mga magtutudlo sa Songgoy, mga barangay opisyales, mga ginikanan ug mga kabataan.
Nagkadaiyang mga pasundayag ang giandam sa mga kabataan uban sa mga matam-is nga pahiyom samtang gipakilig sab ni News Director Kenneth Bustamante ang mga katawhan nga mitambong pinaagi sa iyang balak.
Sigon pa ni manager, dili layo ang iyang kasingkasing sa tulunghaan sa Songgoy sanglit nahimo man siya kanhing parte sa tulunghaan. Malipayun nga gipaambit ni Antonio Amigable, ang head sa nasangpit nga tulunghaan nga mapasalamaton siya sa aktibong pagtubag sa iyang hangyo. Gipaniguro ni manager Mel nga lauman pa ang daghang mga tulunghaan nga maduaw sa DXPR arun sa paghatag sa tiunay nga serbisyo ngadto sa publiko.
