Di makapawong sa kainit ni Cebu City Councilor Dave Tumulak sa pagtabang aron mapatuman ang peace and order sa dakbayan , ang giatubang niining tulo ka kaso nga gipasaka sa Criminal Investigation and Detection Group-7 .
Ang mga kaso may kalabutan sa pagrespondi ni Tumulak sa nahitabo nga giingong suway nga pag-ambush sa sakyanan ni Tejero Barangay Councilor Jessielou Cadungog nga niresulta sa kamatayon ni PO3 Eugene Calumba .
Si Tumulak maoy nidali pagtabang sa drayber sa motorsiklo nga gisakyan ni Calumba nga si Michael Banua aron di kini dumugon sa mga tawo nga nasuko tungod sa insidente .
Mga kasong physical injuries , grave threat ug grave coercion ang gipasaka batok ni Tumulak human pasanginli nga apil sa nikulata ni Banua .
Apan matud ni Tumulak si Banua mismo ang makasulti kung unsa ang kamatooran nga gilauman sa konsehal nga mogawas ra gihapon sa saktong panahon .
