Gilauman karon sa Misamis Oriental Provincial Tourism Department nga modagsa ang kapin tunga sa milyong mga deboto aron mobisita sa nagkadaiyang destinasyon sa lalawigan karong Semana Santa.
Matud ni Atty. Jeffrey Saclot, ang head sa Tourism Department nga nag-una ang Divine Mercy Shrine sa ginabisita sa mga deboto.
Gipahibalo usab niini ang mga pipila sa mga lugar nga sagad ginabisita sa katawhan atol sa Semana Santa nga gilangkoban sa Immaculate Conception Church sa Jasaan, Our Lady of Lourdes Shrine sa Binuangan, Sipaka Heights sa Talisayan, Christ the King Shrine sa Gingoog City ug Hinuklog street play nga “The Passion of Christ”.
Dugang pa ni Atty. Saclot nga nakigkoordinar na karon ang Provincial Disaster Risk Reduction and Management Office sa Provincial Police Office ug 58th Infantry Battalion kinsa maoy mobantay sa seguridad sa mga deboto.
