Report ni: Jennifer Palomo Debaja
Ginpamulta sang 50,000 ( SAR ) Saudi Arabia Riyal ang isa ka employment agency matapos ginreklamu sang employer sa labor office ang OFW nga gin hire sini halin sa agency.
Suno sa liaison officer sang ahensiya, nakabaton sila sang sulat halin sa Saudi Labor. Nagreport sa Maktab al Amal (labor office) ang employer sang 23 anyos nga OFW dala ang mga ebidensya nga naga pamatuod isa ka manug hiwit ang nadeploy sang agency nga DH.
Ginrequest sang employer sa labor office nga gusto sini nga mapriso sang duwa ka tuig ang OFW kag masuspended ang agency tungod sa pagdeploy sang manug hiwit.
Base sa pahayag ni Assistant Labor Attache Germie Daytoc, pila sa mga ebidensiya nga ginpakita sang employer amo ang ” HABAK ” nga gina patihan isa ka anting-anting, garapon o botelya nga may sulod lana, isa ka krus, kag isa ka yellow nga papel kon sa diin nakasulat ang pangalan sang employer.
Samtang, ginapanginwala naman sang OFW ang akusasyon nga isa siya ka manughiwit.
“Hindi naman po ako mangkukulam,” pahayag sang OFW, kag wala man ini sang malain nga intensiyon sa pagsulat sang ngalan sang employer sa isa ka papel kag isulod sa bag.
Dugang ni Daytoc, isa ka krimen sa Saudi Arabia ang pag panghiwit o ritual pareho sini. Gina dumilian man sa Saudi Arabia ang pagdala sang mga bagay pareho sang nakita sa OFW.
“Huwag kayo magdala ng mga items tulad ng anting-anting. Huwag kayo magdala ng crucifix kahit tayo ay may maigting na paniniwala dahil bawal yan dito sa lugar na ating pinuntahan, dapat respetuhin natin ang kultura nila, ang paniniwala nila, dahil bago tayo magpunta dito ay kasama yan sa orientation na ginagawa sa Pilipinas,”pahayag ni Daytoc.
