General Santos City—kalisod ang gitudlong rason sa usa ka ginang nganong siya namaligya ug iligal nga druga.
Alas 4:00 ang takna sa hapon kagahapong adlawa, May 11, 2017 dihang nasikop ang ginang nga si Mercidita Dela Cruz,52 anyos, residenti sa Alunan, Bagsakan Extention, Barangay Bula, Gensan pinaagi sa Buybust operation nga gipahigayon sa Philippine Drug Enforcement Agency (PDEA) Regional Office-12 sa pagpanguna ni Director Gil Cesario Castro nga miresulta sa pagkasikop sa nahisgutan human kining napalitan ug (1) ka sako sa gituohang shabu.
Sumala sa ginang nga siya napugos lang sa pagpamaligya ug shabu tungod sa kapit-os sa panahon sa kasamtangan. Dili matud pa igo ang iyang kita isip vendor ug gulay ingon man kita sa iyang bana isip matador ug karne sa palengke sa ilang panginahanglanon sa panimalay.
Dihang dunay nitanyag kaniya nga mamaligya ug shabu, wala na kini nag duha-duha nga dawaton aron lang makakwarta, sanglit siya sayod nga iligal ang iyang gisudlan ug mamahimo syang mabalhog sa prisohan.
Sa kasamtangan ang suspek kasamtangang balhog sa silda sa PDEA Regional Office-12 samtang giandam ang kasong paglapas sa RA 9165 nga atubangon niini.
