Tungod sa lalis sa giprendang grinder, fruit vendor gidunggab patay!

217
Ang biktima sa pagpanunggab patay samtang gisusi sa personahe sa SOCO. / Photo by: Ariel Mercado

Gidunggab patay ang usa ka fruit vendor kagahapon sa hapon diha sa GK Shell Village, Calaanan, Brgy. Canitoan ning syudad sa Cagayan de Oro.

Nahitabo ang maong krimen pasado alas 2 ang takna sa hapon kagahapon kung diin naila ang biktima nga 36 anyos nga si Manny Essosco, minyo apan bulag kini sa asawa, fruit vendor nga residenti sa maong lugar.

Samtang ang suspetsado usa ka 35 anyos nga si Raymond Calit, construction worker nga nagpuyo ra gihapon sa gikabutyag nga lugar.


Matud pa ni Rolly Naguita, usa sa mga nakasaksi sa maong krimen nga nga nagkalalis ang duruha tungod sa gi-prendang grinder ni Calit ngadto sa biktima. Hangyo sa suspek nga kuhaon una ang nasangpit nga grinder kay dunay project ni-ini ug bayaran lamang pagkahuman.  Gikabutyag nga wala misugot si Essosco hangtud nga nagkalalis silang duha nga misangpot sa ilang pagsinumbagay.

Nasayran nga human sa ilang pagsinumbagay, miuli si Calit sa ilang panimalay ug mikuha sa iyang hinagiban dayon gibalikan ang kontra ni-ini ug gidunggab sa iyang dughan si Essosco nga maoy hinungdan sa iyang kamatayon.

Dayong mitahan ang suspek sa otoridad dihang giadtoan kini sa iyang pinuy-anan ug narecover sa otoridad ang 36 pulgadas nga kutsilyo nga ginamit ni-ini sa pagdunggab sa biktima.



Ang maong suspetsado karon temporaryo naka detain sa Police Station 7 sa Brgy. Bulua ning syudad samtang giandam na ang tukmang kaso nga ipasaka sa korte batok kaniya.

Kasama mo sa balita, RadyoMaN Andy Coco, DXCC Tatak RMN!

Facebook Comments