Davao City – Nagtuo ang Davao City Tourism Office nga walay negatibong epekto sa turismo sa tibuok nasud ang Nationwide Midnight Liquor ban ug Curfew hour nga plano ipatuman ni Pangulong Rodrigo Duterte.
Kung nahimong epektibo sa siyudad sa Dabaw ang liquor ban ug curfew walay rason aron dili musalir ang implementasyon niini hilabi na nga dili kini makatandog sa turismo sa tibuok nasud.
Hinuon, wala gihimakak ni City Tourism Officer Generose Tecson nga dunay mga langyaw ang gareklamo sa oras sa sa mga ba’y kalingawan apan gitindugan niini nga dapat sila mag-adjust.
Alayon niini, nagpadayag og suporta si Tecson sa laraw sa nasudnong kagamhanan nga ipailawom ang tibuok nasud sa liquor ban ug curfew hour inig abot sa 12:00 sa tungang kagabhion.
Kaniadto nga sa wala pa’y liquor ban ordinance daghan sa mga batan-on magbinuntagay og tagay sa mga ba’y kalingawan diin ang uban magbikil ug magsinukmagay hilabi na kung hubog na.
Apan sukad napatuman ang Liquor Ban Ordinance niadtong 2016 dinhi sa dakbayan tagsa na lang ang insidente sa away sa mga hubog sulod sa mga establisemento nga gabaligya og ilimnong makahubog.
Nasayran nga ang Liquor Ban Ordinance of 2016 maoy gi-amenda sa unang Alcohol Ordinance of 1994 sa siyudad sa Dabaw.
Hangtud karon wala pa sila’y nadunggan kun nahibaluan nga adunay mga negosyante ang nagreklamo tungod nalugi na ilang operasyon sa ilang ba’y kalingawan gumikan sa ordinansa, dugang ni Tecson.
RadyoMaN Joel Viray
