Isa ka turista na taga Davao City an nahiligad patay samtang ini mikanaog sa hagdan sa isa ka tourist house na ija taghuy-an didto sa Brgy.4,Poblacion,General Luna,Siargao Island ,Domingo sa gabii. Sa imbestigasyon nan General Luna Police,nakilay-an an biktima na isa ka Melany Dionzo Dumangcas,44 anyos,minyo,residente nan brgy Agdao, Davao City. Sa imbestigasyon nan mga otoridad nasayran na si Dumangcas an iban sa grupo nan mga maestra na nagbakasyon sa Gen.Luna, ug sila nagrenta sa isa ka two-storey house o duha ka andana na bayay na tagpanag-ija ni Vilma Andaya. Sumaya sa istorya nan kaibanan ni Dumangcas na si Elena Lu-ang na sa pagkagabie nibati nan kasakit sa tijan si Dumangcas ug nagdesisyon na magpahuway anay sa 2ndfloor na bahin sa ila tagrentahan, samtang an ija mga kaibanan didto sa ubos na bahin naglingaw-lingaw ,ila pa gitawag ini na munaog para muapil sa ila kabibo ug sa pagkanaug sa biktima kalit lamang ini nahiligad sa hagdan na nagresulta sa ija kamatayon. Gidali nila tagdaya an biktima sa suod na clinic para matambayan pero gideklara ini na dead on arrival, ug sumaya pa sa Gen Luna MPS na wayay ila nakita na foul play sa amo na aksidente. ( RadyoMaN Winston Ensomo)
