Ubang eskwelahan sa Davao i-mandatory gihapon ang pagsuot sa face mask

Davao City – Luyo sa direktiba sa national government nga paghimong optional sa face mask sa indoor settings, mandatory gihapon ang pagpatuman niini sa pipila ka eskwelahan dinhi sa Davao City human nagsugod ang full face-to-face classes kagahapong adlawa (Nobyembre 2, 2022).

Sa interbyu sa DXDC RMN Davao kang Reynaldo Pardillo, magtutudlo sa Sta. Ana National High School, gisaysay niini tungod sa kadako sa populasyon, muabot sa 50-60 ka mga estudyante ang anaa sa usa ka classroom, hinungdan nga kinahanglang i-require og face mask tungod kay dili na mapatuman ang social distancing.

“Very congested kaayo ang atong classroom sa karon. Unya kung wala lang ‘tay gitawag nga Coronavirus or wala lang ‘tay gitawag nga contamination, okay lang unta (nga dili mag-face mask),” saysay ni Pardillo.

Sumala ni Pardillo, gitugotan nila nga dili mag-face mask ang mga estudyante gawas sa classroom o sa open spaces. Hugot usab nga gina-monitor ang temperatura sa mga estudyante ug dili pasudlon kung adunay simtomas sa Coronavirus Disease 2019 (COVID-19).

RadyoMaN Kirby Manzon