Davao City – Padayong nakig-alayon karon ang Land Transportation Franchising and Regulatory Board (LTFRB) sa mga local government units (LGUs) sa laing probinsya sa Davao region sa balik-biyahe padulong ug paggawas sa syudad sa Davao.
Sa interbyu sa DXDC RMN Davao kang LTFRB-XI Regional Director Armand Dioso, gibutyag niini nga dili pa pinal ang balik-biyahe sa mga provincial buses karong Lunes, Mayo 25, 2020 labi na nga adunay kaugalingong mga palisiya ang matag probinsya sa pagpasulod og mga pasahero labi na sa sitwasyon karon sa Coronavirus Disease 2019 (COVID-19).
“Dili pa final (ang biyahe) kay gina-coordinate pa namo kadtong mga lugar sa destinasyon sa bus gikan sa Davao City kay I understood ‘duna poy mga guidelines gipanghatag ang atoang mga silingan nga mga LGU dinhi sa Davao region,” saysay ni Dioso.
Gipasabot ni Dioso nga walay problema ang syudad sa Davao sa biyahe human nga mitugot na kining magpasulod og mga provincial buses apan angay karong ma-koordinar ang ubang probinsya nga nagbaton sa kaugalingon niining guidelines sa biyahe aron dili magbaton og problema panahon sa transportasyon.
RadyoMaN Kirby Manzon
