Davao City – Gitino karon sa Department of Health (DOH) Davao Region nga walay mga estudyante gikan sa Mindanao ang naturokan sa Dengvaxia vaccine nga nahimong kontrobersiyal karon human nasuta nga wala diay miagi sa makuti nga pagtuon sa World Health Organization (WHO).
Sumala ni DOH Assistant Secretary Abdullah Dumama nga base sa ilang monitoring walay mga bata sa Mindanao natusokan sa dengvaxia dihang gilunsad ang bakuna dihang si Janeth Garin pa ang secretary sa DOH niadtong 2015.
Kapin 700,000 ka mga estudyanteng kabataan sa tibuok nasud namiligro karon human giturokan sa anti-dengue bisan og walay dengue diin nasuta nga delikado diay kini sa panglawas sa bata kay pwede pagrabehon ang kahimtang niini kun matakbuyan sa virus.
Gitug-an ni Dumama nga apektado karon ang mga programa sa DOH nunot sa pagbuto kontrobersiya sa 3.6 bilyones ka pesos nga kantidad nga Dengvaxia vaccine.
Gani adunay nadawat nga taho ang DOH Mindanao Cluster nga dunay mga tawo karon gibati og kabala-ka sa mga program sa mao nga ahensiya apan kini nagsumikad sa ubang dapit sa Davao Region.
Apan gibarugan niini nga walay angay ikabalaka ang katawhan kay hugot ang ilang monitoring sa liboan ka mga bata nga nabakunahan sa anti-dengue nga Dengvaxia.
Giangkon sa assistant secretary nga dunay epekto sa lawas ang Dengvaxia apan maglungtad pa kini hangtud sa 30 ka bulan ayha mutomaw ang infection sa mao nga bakuna.
Busa miapelar kini ngadto sa publiko hangtud mahimo dili maglike ni magshare sa mukulat nga mga taho sa social media aron dili magpanic ang mga tawo labot sa Dengvaxia isyu.
Mibalibad na og kumento si Assistant Secretary Dumama nga kun angayan bang gukdon ug kasuhan ang kanhing mga opisyal sa DOH nga nagsilbi sa termino ni Former President Benigno Aquino III gumikan sa multi-billion Dengvaxia vaccine.
RadyoMaN Joel Viray
