Davao City – Nakita matud pa sa usa ka witness nga adunay kuyog nga 15 anyos nga lalaki ang 4 anyos nga batang gibitay hangtod namatay sa Matanao Davao del Sur ayha pa man nahitabo ang krimen.
Kini ang pinakaulahing update sa Matanao Municipal Police Station atol sa interview sa DXDC RMN Davao kang Police Investigator II Ronelyn Gomez.
Sumala ni Gomez nga ginapalawman pa nila ang imbestigasyon sa maong panghitabo diin sa karon, wala pa gihapoy matudlong responsable sa pagkamatay sa 4 anyos nga bata.
Kahinumduman nga unang giingon sa pulis sa Matanao nga posibleng adunay deperensya sa pangutok ang mibuhat sa maong krimen niadtong Hulyo 24 sa sitio Botilon, Brgy. Cabangbangan, Matanao.
Padayong panawagan sa kapulisan nga makig alayon kanila og kinsa man ang nakakita sa gibuhat ngadto sa bata.
Samtang gihatagan na sa lokal nga gobyerno og hinabanag ang pamilya sa biktima apan hustisya gihapon ang singgit sa pamilya sa 4 anyos nga batang lalaki kinsa gihaya na sa ilang panimalay sa nasangpit nga lugar.
RadyoMaN Renz Barbarona
