Dipolog City – NAKAANGKON ug usa ka samad dinunggaban sa liog ang usa ka ulitawo human gidunggab sa kainom kaganihang kadlawon, pasado mga ala una diha sa usa ka subdivision sa barangay sta. isabel, dakbayan sa dipolog.
Dead on Arrival sa zamboanga del norte medical center ang biktima nga si Nisty A. Cañete, 22 anyos, ug lumulupyo sa barangay galas, dihang gidungab kini sa suspetsado nga si Rammel Macasanday, 24 anyos, nga lumulupyo sab sa nahisgutang dapit diin nahitabo ang insidente
Sa inisiyal nga imbestigasiyon sa kapolisan sa dipolog, gipangunahan ni Police Senior 3 Alan Tapales, nga nag-kainom ang duha uban sa laing barkada ug sa dihang lango na sa ilimnong makahubog ang suspek kalit lang nabingkil.
Giingong kalit lang mikuha og kutsilyo ug giluba ang biktima, nga maayong pakataop sa kutsilyo diha sa li-og.
Grabi karon ang kalagot sa pamilya sa biktima ngadto sa suspetsado dihang nahibaw-an nila ang nahitabo kang Nisty nga wala na kini kinabuhi sulod sa tambalanan.
Ang suspetsado unang misibat human sa insidente apan sa follow-up operation nga gipahigayon sa kapolisan, nasapon kini ug nasikop, hinungdan balhog na kini sa prisohan ning panahona.
Karong adlawa gikatakdang pasakaan og kaso ang suspetsado samtang giimbitigahan pa sa kapolisan ang motibo niini.
