Sibuco-Padayon pa karon nga gipangita sa kapulisan ang suspek sa pagpanigbas nga nahitabo didto sa Sitio Dapitan, Pob. Sibuco, ning atong probinsya niadtong adlawng Domingo mga 7:45PM.
Ang biktima sa pagpanigbas mao si Alvin Igasan Samlani, 22 anyos, ulitawo, molupyo sa nahisgutan nga barangay.
Samtang ang suspek nga mitigbas sa biktima ug hangtod karon padayon pang gipangita mao si Jordam Baguinda Atani, 50 anyos, usa ka mag-uuma.
Subay sa makuting imbistigayon sa kapulisan sa maong lungsod samtang ang biktima nag inusara kining galingkod sa bangko duol sa panimalay ni Manandi Dacon, ang suspek, lango kini sa ilimnong makahubog, miduol kini sa biktima sa walay daghang pangutana direkta kining mitigbas sa biktima gamit ang mahait nga sundang, dali usab kini nga misibat sa wala masayring direksyon.
Naka angkon ug samad tinigbasan sa walang bahin sa nawong ug sa luyong bahin sa ulo.
Sa pagkakaron padayon pang nagpaalim ang biktima sa iyang samad sa balay tambalanan samtang ang suspek padayon usab ang pagpangita sa kapulisan aron manubag sa salaod nga iyang nabuhat.
